L. Rothanglien Khawbung.
President, HSA General Headquarters.
HSA Day vawi 85-na puolin members hai po po Chibai ka bûk cheu.
Hi pâwl inzâumtak hi ṭhuoitu hmasa haiin hmathîlr seitak le ngaituona inthûktak hmangin Kum 1939 khan an lo indin a, pâwl ropuitak le hlawtling tak niin Pathienin mal a sâwmin a ṭhuoi hle ti chu a chieg a nih. Kum 84 sûng zet ṭhuoitu ṭha tak takhaiin an ṭhuoi a, HSA Day vawi 85-na huna President ka ni thei hi kei le kei khawm kan suong hle. Hi chen mi ṭhuoitu Pathien kuomah chawimawina um raw se!
Hi pâwlin a tum tak, inchûkna kawng, fak le dâwn zawngna kawng le Khawtlâng inṭhuoina chenah ‘Sin-in’ ti hmasuonin taima le tlâwmngai taka hmaṭhuoitu ding ei nih ti ei hriet thar a pawimaw hle. Hnam ta ding le Khawtlâng le Kohran chena hmasâwnna kawnga lam indik le chîngdân ṭha hi thilthaw le ṭawngbau a ‘Hril-in’, ṭhangpui ngai le sawmdâwl ngai hai ‘Sanin’, Hnam, Khawtlâng, Kohran le mani insûng seng ‘Ṭhuoiin’, ringumna, indikna le taimâkna hmasuonin ‘Hnam Rawng Bâwl’ hi ei sin mâkmaw ani ti a thar takin hrie seng ei tiu.
Hi chen mi ṭhuoitu hi Lalpa ani ti hrie zingin Ama ṭi zing pumin intuoithar seng dingin members po po ei infiel thar a nih.
Tulâi ei hun tawng ditumnaw tak hmasuon mêk khawm hi hmang thiem a, sel tak le huoi takin ei ram le hnam ta dinga ban pawimaw tak ei ni seng hi a ṭul hle. Ei hnamin a mi ko seng ani ti hrie thar seng ei tiu. Ei theina hai inang naw nuol sienkhawm, nang i hmunah, kei ka hmunah ti in kal châwi seng ei tiu.
HSA dam zing raw se!
L. Rothanglien Khawbung
Ni 3, Changer, 2023
