Dated: Aizawl, Mizoram, 3rd October, 2016
HSA a ka member chanpui hai popo, nu le pa, thuoitu inzaumtak tak le Hmar mipui popo HSA Day chibai ka buk cheu… HSA kum 77 tling kum (Oct. 03.2016) chen chen Pathien kut hratin ami thuoina hi a ropui in lawm a um hle. Hnamdang le pawldang hai ta ding chun thil ropui ninaw sienkhawm HSA le Hmar mipui ta ding chun thil inchik tlak ani ti hi inhmai ruol ani nawh.
Ahmasa taka Pathien kuomah lawmthu hril mawl mawl ei batin ka hriet. Asan iemana eiti chun…hi chen chen hi kum tam chau chang met lo um sienkhawm HSA hi Pathien in hring zing in a mi siena le record hai po po le activities hai inchatloa mi thuoitu chu ei Pathien a nih. Pawl dang le organisation tamtak hai chu kum iemanichen hnung a thi a keitho nawk dam an nih hlak. Amiruokchu, HSA hi chu damzing ding in Pathien in thuoitu tha a mi pek hlak a nih. Thuoitu hmasa hai po po chungah lawmthu ka hril bawk.
Chun tukum HSA day bik lem hi chu thuoitu tamtak lai Pathien in thahrui hratna thuruk dam a pek niin ka hriet a, sawiselna tamtak kara malsawmna ei dawng nasa hle. Tukum ang neka HSA sunga inhrietpawna thalem le inpawtawnna tha hi ala umin ka hriet naw bawk. Hilai zinga hin tukuma ei hun hmang dan dinga ei thuoitu hai Pathienin varna thara inthuomin ama ei hnai nawk zuol theina dinga hun hmang dinga inhriettirna an dawng khawm hi lawmna tham a nih.
Chu leiin kum 77 sung a khan HSA chun thil relsuol le suksuol alo nei elthei Pathien le mipui lakah. Thuoitu mimal le mimal el ni loin pawl anga rel suol le thaw suol dam eilo nei ani chun, chu suol thupha chu ei chawi a tul a, an hriet leiin remruotna thatak an hung nei hi zawm ngei ding in JHQ tin, Branch tin le Unit tinin Pathien tienga tlulut nawk dingin tawngtaina in hun hung hmang seng dingin ka hung ngen cheu a; ei tawngtainahai Pathien hma a rimtui ani ngei ka beisei tlat.
Inchuklai thawtha zuol bik vawisunni le hun danga ei ichawimawi hai popo le mani fakzawngna dinga inchukna hmanga sin hmu hai popo lawmpuina ditsak chibai ka buk cheu. Lawmman dawng phaknaw le mani tum le dit sin la hmu phaknaw tamtak ei um ka ringa, lunghnuol loin thaw fan fan eita, ei ta dingin Pathienin lawmman iemani ami sie pek ani ti hriein chu chu hmu le chang tumin tumru le thafan takin inchukna le khawsaknaah hmasawn peiin hmatieng pan hart nawk zuol ei tiu… “Sinin, Hrilin, Sanin, Thuoiin – Serve the Nation” ti changchawia ei umna hmun senga ei insung, ei khawtlang ei ram le hnam suk mawitu le suk vultu ni seng dingin vawisun ni hin ka ditsakna insangtak kan hlan cheu. Ka lawm ie!
HSA damzing sien, Hmar Hnam vul pei raw seh.
(L ROTHANGLIEN KHAWBUNG)
President
HSA General Headquarters
HSA Complex,
Churachandpur Manipur