CIRCULAR
HMAR ASSOCIATION, GENERAL HEADQUARTERS :: DATE 21/02/2016
A hmasatakin HSA GHQ hmingin tiemtu hai popo chibai vochuom ka buk cheu. Pathien mi thuoina zar le thuoitu ditum tak takel hai thahnemngaina le nu le pa hai zarin vawisun hun hi HSA khawmin hun thar lawmum tak hmuin kum 2015-17 sunga 55th General Assembly a thlang thar thuoitu hai khawmin an mawphurna hai an hung chel tan ta hi ei lawm hle a nih.
Hmadawm le bak tamtak thaw ding le bawzui ding tamtak hai ei neia chuong laia a pawimaw zuol tlangpui hai tarlangna dingin hi General circular hung insuo a nih.
2016 HSA KUM THUPUONG
55th Gen. Assembly a lo rel ta angin, tukum kum 2016 a HSA kum thupuong chu “Inchukna hmanga Ram le Hnam indinthar” ti hi anih. Ei ram le hnam sietna hai le siemthar tul hai le ei hma dawm mek hai hi inchukna hmanga siemtha a indinthar dingin member popo le mitin ei inngenin ei infiel bawk a nih.
HSA LIFE MEMBER
Membership hi fumfe taka ei nei theina dingin JHQ le Branch tin hma nasa taka la dingin ei infiel thar nawk anih. Member naran el niloin Life Member khawm hi nei ta inla ti leiin HSA LIFE MEMBER hi iengtiklai khawm ni thei ani ta ding anih. Hi Life Membership drive hi JHQ tin le Branch hai mawphurna ning ata, Life Member ni ding hin Rs. 5,000/- chau chawia ni thei ani bawk anih. Hi membership fee hi tangkai taka ei hmang theina ding tiin Hmar Student’s Education Fund (HSEF) a lut ata, hi sum hai hin inchukna tienga harsa zuol hai thangpui beisei anih. Life Member hai chu Citation le Membership Card pek ni bawk an tih.
STATISTICS & DATA BASE
Education & Employment statistics hi tha taka ei nei theina ding ngaituo in Statistics Secretary GHQ in ei hang inruot thar a, hi anthawka hma la in tukum October thla bo hma hin website hmangin a ei record popo hi van boruok a mitin en thei dingin ei kapkai ve thei ding anih.
INCHUKLAI HARSA CHAWM LE COMPETITIVE COACHING
Inchuklai khawsakna a harsa lekha thiem thei si le inchukna tienga beisei um hai hi tukum a inthawk hin mi 10 bek zawngdawk a thangpui nisien ti chu ei thiltum anih. Hihi sukpuitlingna ding hin mi tlawmngai hai le a bikin school neitu hai khawm an inphal emem thu hai eihrietin lawmum ei ti hle a, mani kut hai suksei a thangpui ngai hai thangpui thei dingin mitin ei infiel thar a nih.
Sin zawngna le admission chen khawm nisien Competition (inruolsiekna) hi a’n sang tae m em leiin inchukna hmun pawimaw na hmun hieng Aizawl, Shillong, Guwahati, Delhi, Haflong, Hmarkhawlien le Churachandpur a hai hi Free Competitive Exam Coaching hai buotsai ei tum bawka inhnikna neitu hai le thahnemngai popo mani thang theina zawn senga thang dingin ei infiel bawk anih.
EDUCATION CAMPAIGN
Inchukna hi kawng iengkima ei hringnun suk awlsamtu ani ti thupui changchawin kum iemani chen anthawka ei lo fepui ta angin tukum khawm hin tlangram hmun hran hranah hai Education Campaign neiin hma ei hang lak nawk tum anih. Hihi hlawting taka ei nei theina dingin mitin lungril inhawng taka inchukna pawimawzie hriet thar ding le ei mamaw zie hrie thar pei dingin ei in fiel anih.
EDUCATION FUND
Inchukna tienga nasa taka kut ei rawla eiin sawmdawl theina dingin Hmar Students’ Education Fund (HSEF) ei nei a, hi sum a inthawk hin Coaching dam ei thangpui a, Education campaign hai thei ang angin ei thaw a, Career Guidance programme hai ei nei a, tuhin hma dawm suklien peiin inchuklai harsa hai khawm ei thangpui tum pei anih. Tukum 2016 sung hin HSEF hi Rs. 5,00,000/- (cheng nuoi nga) bek hmusuok tumin nasa taka hma lak tum ani bawk anih. Inchukna tieng hin nasa taka thang ei lak a lam hran hran le sin thawding hran hran hai le inchuk ding hai inhrilhrietna sin hi House to House Campaign hai chen khawm thaw dingin inbuotsai mek ani a, Nu le Pa le mi tlawmngai hai le Pathien zarin ei puitling ngei ei beisei tlat bawk anih.
INSUKHRAT THAR DINGA NGENNA
JHQ le Branch term tawp ta hai popo an hma tienga Conference/ inthlang rawt dingin ei inhriettir anih. Chun, mani JHQ sunga Unit tin hai suk hring le suk hrat hi ei mawphurna lieu lieu ani leiin sukthar a kan thar seng dingin eiin fiel a, Unit phun theina awma hai khawm Unit indin peia insuk hrat dingin JHQ popo ei inngen nawn a nih.
Thuoitu hai tlinglo tak le hratlo tak ni inla khawm tlinnawna hai a indawm tuo a, in tawngtaipui a, thurawn tha hai mi pe dingin mitin eiin fiel a, Inchukna hmanga ei Ram le Hnam hi keitho thara sirbi pakhat bek a hlangkai dingin lunginsiettaka thahnem ngaia lung inruoltaka thang la seng dingin ei in ngenin ei in fiel nawn nawk anih. Lalpa Pathien in mi umpui zing sien.
HSA Dam zing rawse… Ka lawm ie.
HSA aiin, in thahnemngaipui,
Josef V Tuolor
Gen. Secretary, HSA GHQ